Lamentations 3

1aAma thangpaihna khetbuk in
a bawlsiat a mu khinpa ka hi hi.
2 Amah in kei hong hawlkhia a,
khuavaka hong paisak tangin khuamial lakah hong paisak hi.
3 Hi takpi hi, a khut ka langkhatah pangsaka, ^a
sun nilohin hong tua cih kikkik hi.
4 Ka vun le ka sa tekhsak a,
ka guh a sutan zo hi.
5 Amah in haksatna le khaatna tawh
ka kimkot ah hong umcih hi.
6 Amah in sawtpi-a sisate bangin
khuamial lakah kei hong tengsak hi. ^b
7 Ka suahtak theih loh nadingin kulh hong ciankhum a, ^c
sikkhainiang gikpi in hong khih hi. ^d
8 Awngkhia a huh nading ka nget nangawnin
ka thungetna a khakcip hi.
9 Amah in ka lampi-ah suang ciangin khaktan a,
ka lampi a kawisak hi. ^e
10 Vompi bangin boksa in na ngak a,
humpinelkai bangin hong buk hi. ^f
11 Lampi panin hong bawh a,
kei hong hualpekin hong huh ding om loin hong nusia hi. ^g
12 A thal keka, ^h
a thaltang muitum in hong nei hi. ⁱ
13 A thaltang bawm sunga thaltangte in
ka lungtang hong sunlet hi.
14 Ka mite khempeuh nuihsat in ka om a, ^j
sun niloh in hong ciamnuih uh a la-in hong sa uh hi. ^k
15 Amah in singkha hong khamsak a,
sinkha tui hong dawnsak hi.
16 Suanghiam in ka ha khong a, ^l
leivui lakah kei hong tuancil hi. ^m
17 Lungnopna tawh ka kigamla a;
daupaina ka mangngilh ta hi.
18 Tua ahi ciangin,
“Ka thupina bei ta a, TOPA tunga ka lametna khempeuh a bei ta hi,” ka ci hi. ⁿ
19 Ka gim thuakna, ka vakvaina le
sinkha le a khaatna ka phawk gige hi.
20 Tuate hoihtakin ka ciamteh a,
ka sunga om ka hinna a lungkia hi. ^o
21 Tua hi napi ka lungsima ka phawk khat om a,
tua ahi manin lametna ka nei hi.
22 TOPA hong khuatuahnate bei ngei lo ahimanin ^p
a lian mahmah hong itna hangin eite i kangtum kei hi. ^q
23 Zingsang simin tuate thaksuak a,
na muanhuaina lian mahmah hi.
24 Kei le kei in, “TOPA kei tanh ahi hi; ^r
tua ahi ciangin amah ka ngak ding hi,” ka ci hi.
25 Ama sungah lametna nei-a
amah a zong mite tungah TOPA hoih hi;
26 TOPA hotkhiatna daitaka
ngak hithiat ding hoih hi.
27 Mi khat in a khangno lai-in
hakkol a puak ding a hoih hi.
28 TOPA in ama tungah a tunsak ahi manin
daitakin amah guak tu hithiat hen.
29 A maitang leivui lakah phum hen-
lametna om thei lai kha ding hi.
30 A paang a beng dingpa dawh henla
maizumna tawh dim hen.
31 Ahang in, Topa in
mite a pampaih tawntung kei hi. ^s
32 Dahna hong thuaksak zongin a khuatuahna hong lak ding hi,
a kip tawntung ama itna lianlua hi.
33 Ahang in, amah in mihing tate tungah
bawlsiatna le dahna lungkimtakin a tungsak kei hi. ^t
34 Gam sunga mi khempeuh khenuai-ah
a kisikcip ciang,
35 Sangpen Pa mai-ah
mihing khat thuneihna a kinial ciang,
36 mihing khat thutanna a kilakkhiatsak ciangin -
Topa in tua nate mu lo ding ahi hiam? ^u
37 Topa sehkholh lohpi-in kua pau thei a,
a ma gen bangin piang thei ahi hiam? ^v
38 Tuahsiatna le a hoih nate
Sang Penpa’ kam pana piang khawm hi lo ahi hiam?
39 A mawhna hangin dan a kipiak ciangin
bang hangin a nungta mi khat phun ding ahi hiam?
40 I lampite en pha in sittelin ^w
TOPA lamah kihei ni. ^x
41 I khutte le i lungsimte
vantunga om Pasian lamah laamto ni,
42 “Kote ka mawh uh hi, kong lehdo khin uh a,
ka mawhna uh nong maisak kei hi.
43 “Na hehna-in na kituam a, kote nong nungdelh hi;
hehpih loin nong that hi.
44 Thungetna in a kantan zawh loh dingin ^y
nang le nang meiipi in na kituam hi. ^z
45 Minamte lakah ninthem le ninpaih bangin
nong bawl hi. ^aa
46 “Ka galte khempeuh un kote langah
a kam uh zapi in a ka uh hi. ^ab
47 Kote in launa le gum,
siatna le kisiatna ka thuak uh hi.” ^ac
48 Ka mite kisia khin ahi manin ^ad
ka khitui luitui luang a bang hi. ^ae
49 TOPA in van pan hong ensuka
hong muh matengin,
50 kang thei loin ka khitui
a luangluang ding hi. ^af
51 Ka khuapi numeite khempeuh hangin
ka muh peuhpeuh dahna suakin hong hingimsak hi.
52 Ka galte in a thu omlopi-in
vasa betin hong beng uh hi. ^ag
53 Amaute in leihawmpi sungah khiatlup hong sawmin, ^ah
suangin hong deng uh hi;
54 tui in ka lutung dong khum a, ^ai
a si ding ka hi ta hi,’ ci-in ka ngaihsun hi. ^aj
55 TOPA aw, leihawm thukpi taw panin
na min ka lo hi.
56 “Hong hon in, ci-a ka kikona na bil hong humsan kei in,” ^ak
ci-a kong ngetna nong za hi.
57 Nang kong sap ciangin ka kiangah nong pai a,
“Lau kei in,” nong ci hi.
58 Topa aw, ka thu hong thupisimsakin,
ka nuntakna nong tan hi.
59 TOPA aw, kei hong kikhialhsaknate na mu khin hi.
Ka thu hong panpih in!
60 Phu hong laknopna uh le kei langa a geelsimnate khempeuh uh
a thukna na mu khin zo hi
61 TOPA aw, amaute hong engkonate,
kei langa a geelsimnate khempeuh uh -
62 sun nilohin kei langah ka galte kihosima
a kihuau khuankhuan uh na za zo hi. ^al
63 Amaute en dih ve! A tu uh a a ding uh zongin
kei la-el hong saksan den uh hi.
64 TOPA aw, a khut-ua a sepsa uh tawh kituakin
a thuak dingua kilawm zahin thuk kik in. ^am
65 Amaute lungtang tuamsak inla
amau tungah na hamsiatna tung hen.
66 Hehsa in amaute delh inla
TOPA vante nuai panin amaute susia in.